အိပ်မက်အော်သံ

ကျွန်မ ငယ်ငယ်တုန်းက လူကြီး အလွန် ဖြစ်ချင်သည်။ လူကြီးတွေ လုပ်သမျှ အကုန်လုံး စိတ်ဝင်စားသည်။ အမေ ထမင်းဟင်း ချက်လျှင် ကျွန်မလည်း ၀င်ချက် ကြည့်ချင်သည်။ အမေ တံမြတ်စည်း လှည်းလျှင် ကျွန်မလည်း ၀င်လှည်း ချင်ပါသည်။

သို့သော် အရွယ် မတိုင်သေးတော့ လုပ်ကူတာက ရှုပ်တာနှင့် မထူးသဖြင့် ကျွန်မသည် အမေ့အတွက် မကြာခဏ စိတ်ညစ်စေသည့် အရှုပ်ထုပ် ကလေး ဖြစ်ခဲ့ရသည်။ ထမင်းဟင်းချက်ရာမှာ အမေ့ အလစ်ဝင်ပြီး လက်စွမ်းပြမိ၍ စားမရဘဲ ပစ်လိုက်ရသည့် အခါ၊ အမေ လှည်းကျင်းထားပြီး အမှိုက်တွေက ကျွန်မ လျှာလျှာရှည်ရှည် ၀င်လှည်းပေးမှ ပိုပြီး ရှုပ်ပွကုန်သည့် အခါ၊ အမေမရှိခင် အ၀တ်တွေ ခိုးလျှော်တာ ဆပ်ပြာတိုက်လက်လွန်သွား၍ ရေစင်အောင် မနည်းပြန် လျှော်ယူရသည့် အခါ၊ ပန်းကန်ဆေးရင်း ကျကျကွဲကုန်သည့် အခါ...။ အဲဒီလို အခါပေါင်းများစွာ တွေ့ကြုံရ တိုင်း အမေက ချစ်စနိုး မျက်စောင်းတစ်ချက်နှင့်

“အေးနော်၊ မလုပ်တတ်ခင် အတော် လုပ်ချင်လွန်းတဲ့ ကလေးမ။ ကြီးလာလို့ ဒီ အလုပ်တွေ မလုပ်ချင်ဘူးဆိုရင် ခေါင်းပေါ် အာလူး ဘူးသီးတွေ တန်းစီနေအောင် ကို ခေါက်ပစ်မယ်မှတ်”
ဟု ရယ်မောရင်း ကြိမ်းဝါးတတ်ပါသည်။ အမေ့ စကားကြားတိုင်း ငါ လူကြီး ဖြစ်လာမှ ဒီအလုပ်တွေ လုပ်ခွင့်ရမှာပါလား ဟူသော အတွေးက ကျွန်မ ဦးနှောက် သေးသေးလေးထဲ ၀င်လာလေ့ ရှိသည်။ ထိုအခါ ကျွန်မ လူကြီး မြန်မြန် ဖြစ်ချင်ခဲ့တော့သည်။

၂။
အိမ်၌ လူကြီးတွေလုပ်သမျှ ဘာတစ်ခုမှ ၀င်လုပ် ကိုင်ခွင့်မရသော ကျွန်မတို့ အရွယ်လေးတွေ စုမိကြသော အခါ ကျွန်မတို့ လုပ်နိုင်သောပုံ စံဖြင့် အပြင်မှာ လူကြီးလုပ် ကြပါသည်။ အိုးပုတ်ခွက်တွေနှင့် ထမင်းဟင်းချက် တမ်းကစားကြခြင်းဖြစ်သည်။ ထိုအိုးပုတ်ခွက်တွေထဲမှာ အမေတို့ မီးဖိုးချောင်သုံး ပစ္စည်းပစ္စယတွေ နည်းတူ ရေနွေးကရား၊ မီးဖို၊ ငရုတ်ဆုံက အစပါသည်။ ခြင်းထောင်းနှင့် လမ်းဘေး အရွက်တွေ လည်ခူး၍ ဈေးဝယ်ထွက်ကြ ရသည်မှာလည်း အရသာရှိ ပေစွ။ တကယ့် အစစ်လိုပင် ခံစားပြောဆိုကြသည်။

“ဆန်ဈေးတွေကလည်း ကောင်းလိုက်တာများ နော်”

“မြိန်ရာဟင်းကောင်းတဲ့၊ ဟင်းစပ်တည့်အောင် ချက်တတ်ရင် ချိုတာပါပဲ”

“ခရမ်းချဉ်သီးတွေ လှလို့ သုပ်စားမလား ဆိုပြီး ၀ယ်ခဲ့လိုက်တာလေ”

နိစ္စဓူဝ အမေတို့နှုတ်မှ ကြားသိရလွန်း၍ ရင်းနှီးနေသော စကားလုံးတွေကို အတုမြင် အတတ်သင် စိတ်ထဲ သေချာမှတ်သားထားလိုက် ကာ ကျွန်မတို့စကားဝိုင်းတွေ ၌ မြိန်ရေရှက်ရေ အတုခိုး ပြောကြဆိုကြရတာ အလွန် အာတွေ့လှသည်။ သို့သော် ဒါသည်ပင် လူကြီးတွေရှေ့၌ လွတ်လွတ်လပ်လပ်ပြောခွင့် မရတာတွေ ရံဖန်ရံခါ ကြုံရ တတ်သေးသည်။

“သဘင်သည်၊ သူရူးနဲ့ ကလေးစကားတဲ့။ နင်တို့ ပါးစပ်က ပေါက်ကရ ဈေးနှုန်းတွေ လျှောက်ပြောကြတာ အရေးမကြီးဘူး။ ကျုပ်တို့ လူကြီးတွေမှာ မျက်ခုံးလှုပ် ရတယ်တော့်...”

လူကြီးတွေ ပြောတတ်သည့် အဲဒီစကားကို ကျွန်မတို့ လုံးစေ့ပတ်စေ့ နားမလည်ကြပါ။ ထိုတစ်ခု တည်းမကပါ။ လူကြီးတွေ ပြောနေကျ စကားတွေထဲမှာ ကျွန်မတို့အဖို့ နားမလည်စရာတွေ အများကြီးပင်။ သိလိုစိတ်ဖြင့် လူကြီးတွေစကား ၀ိုင်းနား ယောင်လည်လည်နှင့် ချဉ်းကပ်မိပြန်တော့
“တွေ့လား အတော်စပ် စုချင်တဲ့ဟာလေး။ ကလေး အရာမဟုတ်ဘူး၊ အပြင်မှာ သွားဆော့ချေ”
ဟု နှင်လွှတ်ခံရတတ် သည်။

အဲဒီအရွယ်ဆိုတာက လောကကြီးမှာ ဘာမဆို သိချင်၊ တတ်ချင်၊ အတုယူစူး စမ်းချင်နေသည့်အရွယ်။ အမေတို့လူကြီးတွေ စကားထဲ စိတ်ဝင်စားစရာတွေဖြင့် ပြည့် နှက်နေသည်။ အမေတို့က ဒါ ကလေးအရာ မဟုတ်ဘူးဟု ပြောလာတော့ မချင့်မရဲ ဖြစ်ရသည်။ ဒါဖြင့် မြန်မြန်လူကြီး ဖြစ်မှ အေးမှာပါ။ လောက ကြီးမှာ လူကြီးဖြစ်လာမှ သိစရာတွေ အများကြီး သိခွင့်ရမည်။ တတ်သင့်တာတွေ အများကြီး တတ်မြောက်ခွင့်ရမည်။ လုပ်ချင်တာတွေ လုပ် ခွင့်ရလာမည်။ အဲဒီလို လူကြီး တွေနည်းတူ အရာရာ သိခွင့်၊ တတ်ခွင့်၊ လုပ်ခွင့်ရဖို့ရာ ကျွန်မ မြန်မြန်လူကြီး ဖြစ်လာမှ ဖြစ်တော့မည်။ အဲဒီတုန်းက အိပ်မက်မက်လိုက်တိုင်း အိပ် မက်ထဲမှာ ကျွန်မက လူကြီး တစ်ယောက် ဖြစ်နေတတ်သည်။ ကျွန်မ လူကြီး ဖြစ်ချင်လွန်းတာ တစ်ပိုင်းကို သေလို့။

၃။
ကျွန်မ ခုနစ်တန်းနှစ် အရောက်၌ အဖေ ဆုံးပါသည်။ ပကတိကျန်းကျန်းမာ မာကြီးကနေ ရုတ်တရက် ဦး နှောက်သွေးကြောပြတ်ကာ သေဆုံးခဲ့ခြင်းဖြစ်သည်။ ထို အခါ တစ်သက်လုံး အဖေ့ လုပ်စာထိုင်စားကာ အိမ်ရှင်မ သက်သက်ဘ၀ဖြင့် နေလာခဲ့ သော အမေသည် ဘာလုပ်၍ ဘာကိုင်ရမည်မှန်း မသိဘဲ ကျွန်မလက်ကို တွဲကာ ယောင်ချာချာ ဖြစ်ကျန်ရစ်ခဲ့လေသည်။

“လိမ္မာနော် သမီးကြီး ညည်းကိုပဲ အမေ အားကိုးရ တော့မှာ”

ခေါင်းသာ ရောယောင် ညိတ်ပြခဲ့ပေမယ့် အမေ့ စကားကို ထိုအသက်အရွယ် ဦးနှောက်၌ နက်နက်နဲနဲကြီး မစဉ်းစား မိခဲ့တာ အမှန်။ သို့သော် တိုတောင်းသော ကာလအတွင်းမှာ မသင်ယူဘဲ ကျွန်မ တတ်မြောက်လာရသည်က အများသား။ ပထမဦးဆုံး အနေနှင့် အမေသည် အဖေရှိစဉ်တုန်း ကလို သားသမီးတွေကို ပြုစု စောင့်ရှောက်ရုံသက်သက် မဟုတ်တော့ဘဲ အိမ်အောက် ထပ်၌ ဖွင့်လိုက်သော ကုန်ခြောက်ဆိုင်လေးဘက် အချိန် အများကြီးပေးလိုက်ရခြင်း။ အလည်လာသော မိတ်ဆွေတွေကို အမေက “အခြေအနေ မပျက်ခင် ရှိတာလေးတွေ ထုခွဲရောင်းချပြီး အခြေကျအောင် လုပ်ရတာလေ” ဟု ပြောပြနေ တတ်သည်။ ဆိုင်ကိစ္စကို သိပ်နားမလည်သေးခင်မှာ ကျွန်မ၌ အတွေ့အကြုံတွေ စတင် ရရှိလာသည်။ မနက်ဆိုလျှင် ခါတိုင်းလို ထမင်း စားချိန်နားနီးမှ အမေ့အနှိုး စောင့်ပြီးထ၍ မရတော့။ အမေက မနက်ငါးနာရီခွဲထ၍ ဆိုင်ခင်းတော့ ကျွန်မပဲ ထကူ ရသည်။

“အမေတစ်ယောက် တည်းဆို ဆိုင်တစ်ဖက်၊ မီးဖို ချောင်တစ်ဖက်နဲ့ ဘယ်နိုင်ပါ့ မလဲကွယ်။ ဒီတော့ ကျောင်းချိန်အမီ ချက်ပြုတ်ပြီးစီးဖို့ရာ သမီးကြီး ထကူမှ ရမှာပေါ့”

ထိုအချိန်၌ ကျွန်မ တံ မြက်စည်း ကျွမ်းကျွမ်းကျင် ကျင်လှည်းတတ်နေပါပြီ။ အိမ်ပေါ်အိမ်အောက်နှင့် ဆိုင် တွင်းအပြင် ခြံထဲ၌ပါ အမှိုက် တစ်စမကျန်အောင် ကျွန်မလှဲ ရခြင်းဖြစ်သည်။ ငယ်ငယ်က အမေ ပေးမလုပ်ခဲ့သော လုပ်ပိုင်ခွင့် တစ်ခု ကျွန်မလက်ထဲ ရောက်ရှိလာခြင်းမျှသာ။ လှဲစက အချိုးမပြေတာကိုပင် အမေက “လှည်းပြီးသား အမှိုက်ကို ပိုပြီးပွအောင် ဖွတဲ့ ကောင်မလေး” ဟု ကျွန်မကို မပြောတော့ပါ။ “ဟောဒီလို လှည်းလှည်းပြီး တဖြည်း ဖြည်းချင်းစုသွား၊ အမှိုက်တွေ ပြောင်သွားလိမ့်မယ်” ဟု ပါး စပ်ကလည်းသင်၊ လက်ကလည်း သင်ရင်း ကျွန်မလည်း တံမြက်စည်း လှည်းသည့် အလုပ်၌ ကျွမ်းကျင်သွား သည်။ ရှစ်တန်းနှစ်ရောက် တော့ ကျွန်မ ထမင်းဟင်း တော်တော် ချက်ပြုတ်တတ် နေပြီ။ မတတ်ဘဲ ခံနိုင်ရိုး လား။ “အမေ့ထမင်းအိုးလေး ပွက်လာရင် အိမ်ရှေ့ လှမ်း အော်လိုက်နော်” မှ စတင် လာလိုက်တာ “အမေ့ကို ခေါ် မနေနဲ့တော့ ကိုယ့်ဟာကိုယ် ထမင်းအိုး အပွက်ညီမညီ ကြည့်၊ ပြီးရင် ယောက်မနဲ့ အသာမွှေပြီး ဆန်စေ့ကိုစမ်း ကြည့်၊ အပျော့အမာ အနေ တော်ဖြစ်ရင် ထမင်းရည်ငှဲ့ပြီး မီးအေးအေးနဲ့ ထမင်းနှပ်ထား လိုက်တော့” အထိ လမ်းကြောင်း လာလိုက်တော့ တစ် နှစ် နှစ်နှစ်လည်းကြာရော ကျွန်မတစ်ယောက် မီးဖို ချောင်ကိစ္စ ကောင်းကောင်း ကိုင်တွယ်တတ်သွားပေပြီ။ အလတ်ကောင်က အရောင် တင်မှုန့်ခတ်သည့် ဟင်းကို မစားနိုင်။ အငယ်ကောင်က ဟင်းချက်လျှင် ကြက်သွန်၊ ခရမ်းချဉ်သီးအဖတ် မမြင်ရမှ ကြိုက်သည်။ အထွေးလေး ကတော့ ဟင်းရည်တစ်ခွက် မဖြစ်မနေပါမှ ထမင်းစား တတ်သည်။ ကျွန်မ ဆယ်တန်း အောင်ချိန်၌ မီးဖိုချောင်နှင့် လျှော်ဖွပ်သိမ်းဆည်းရေး ကိစ္စကို အမေ ကျွန်မထံ အပြီး အပိုင် လွှဲအပ်ထား ပေးခဲ့တာပင် အတော်ကြာခဲ့ပြီ။

၎။
“တော်သေးတာပေါ့၊ ဟောဒီ သမီးကြီး တစ်ယောက် ကူဖော်လောင်ဖက် ရထားလို့”

မိတ်ဆွေတွေနှင့် စကား စပ်မိသည့် အခါရယ် ကျွန်မထံ အခက်အခဲတစ်ခုခု ရင်ဖွင့်စရာ ရှိလာတိုင်း ထိုစကားစုလေး ကို အမေ အမြဲသုံးလေ့ရှိ သည်။ ပြောစရာလောက် လောက်လားလားဟူ၍ သမီးကြီး ဖြစ်သူ ကျွန်မမှလွဲ၍ ဘယ်သူမှမရှိရှာသော အမေ သည် အရေးကိစ္စကြုံတိုင်း ဆယ်ကျော်သက်အရွယ်သမီး ကိုသာ လူကြီးအရာ ထားပြီး ဖွင့်ဟ တိုင်ပင်တတ်သည်။ သိကြသည့် အတိုင်းဈေးသည် အလုပ်ဆိုသည်က တစ်နေ့တစ်နေ့ လူပေါင်းစုံနှင့် ပြောဆို ဆက်ဆံရတာ။ လူစုံတော့ စရိုက်စုံသည်။ ထိုအခါ အမေ့ အလုပ်ကနေ ကျွန်မသည် လောက အကြောင်း၊ လူတွေ အကြောင်း မကြားချင်မှ အဆုံး ဖောခြင်းသောခြင်း သိလာရပါသည်။ အဲ့ဒီလိုကနေ ဒီအလုပ်မှာ ဒါမျိုးတွေကြုံရ တတ်ပါလား ဟူသည့် အသိ တွေရသည်။ ကိုယ့်ဘာသာ ကိုယ်သာ မသိလိုက်မိချိန်မှာ အလုပ်၏ အတွေ့အကြုံထံ ကျွန်မ တပည့်ခံပြီးသား ဖြစ်နေလေပြီ။

“လောလောဆယ် ဆိုင် ကြီးကို ပြန်သွင်းဖို့ ပစ္စည်း ကြွေးတင်နေတာက (...) ရှိ တယ် သမီးရေ။ တစ်ရက်ဝင် ငွေထဲကနေ စုကြေး လုပ်ပြီး ဖဲ့စုနေရတယ်။ ရစရာအကြွေးတွေကလည်း တောင်းရခက် နေတော့လေ”

အမေ၏ ထူထဲသော စာရင်း စာအုပ်ထဲမှာ ကျွန်မလက် ရေးတွေနှင့်ချည်း ပြည့်လာသည်။ ဒေါ်ဘုမကတော့ အကြွေးတွေ များလာတော့ တခြားဆိုင် ရောက်သွားပါလား။ မစီရွှေဆိုတဲ့ အမျိုးသမီးက အကြွေးစာရင်း ဖွင့်ခိုင်းတုန်းက ဖွင့်ခိုင်းပြီး ငွေရှင်းချိန် ရောက်ရင် ဟိုဟာလည်း မယူရဘူး၊ ဒီဟာလည်း မယူရပါဘူးနဲ့ ကဂျီကကြောင်ကျတတ်တယ်တဲ့။ ဟိုအမျိုးသမီးကတော့ လက်နည်းနည်းဆော့တယ်။ သူလာရင် သေချာကြည့် ထားနိုင်မှ။ လူတွေ အကြောင်း သိလာတော့ ဒီလိုပဲ အလိုက်အထိုက် ဆက်ဆံတတ်လာသည်။ အမေသင်ပေးတာ မဟုတ်သလို ဘယ်သူကမှ သင်ပေးတာ မဟုတ်ပါ။ အရွယ်နှင့် အလုပ်ထံမှ အတွေ့ အကြုံက သင်ပေးသွားတာ။

“သြော် အဲဒီ ပစ္စည်းလေးက လောလောဆယ် ကုန်နေလို့ မှာထားတုန်း အဒေါ်ရေ” ဆို တာမျိုး၊ “မလုပ်ပါနဲ့ရှင်၊ ကျ ထားတဲ့အရင်းက များနေလို့ မလျှော့တော့တာပါ။ နောက်တစ်ခါဆို ကြည့်လျှော့ပေးပါ့ မယ်” ဆိုတာမျိုး။ အဲဒီလို လူတွေကိုကြည့်ပြီး အလိုက် အထိုက် ပြောဆိုဆက်ဆံတတ် လာသည့်ကျွန်မ၊ အမေ့ မျက်နှာကို တစ်ချက်ကြည့်ရုံ မျှဖြင့် အသံမဲ့ စကားလုံးတွေကိုလည်း နားလည်နေတတ်တာ မဆန်း။
“ရိုးရိုးလိုင်းပဲ အမေရယ်၊ ဘယ်အချိန်မှ တက် တက် ရပါတယ်။ လောလောဆယ် အောက်က အငယ်တွေက အပြိုင်းအရိုင်းနဲ့ တက်လာကုန်ကြပြီ။ သူတို့နဲ့ တင် အမေ မောနေတာ။ သမီးက ရပါတယ် ဖြည်း ဖြည်းပေါ့”

“သမီးအတွက် အ၀တ်အစား သစ်က အသာထားပါဦး အမေရယ်။ အိမ်မှာပဲနေတဲ့ ဥစ္စာ။ လောလောဆယ် အငယ်တွေ ဘာလိုသလဲပဲ ဦးစားပေးကြည့်လိုက်ပါ။ ပြည့်စုံအောင် ဖြည့်ဆည်းပေးတော့ သူတို့လည်း ပညာရေးမှာ ကြိုးစားရတာ စိတ်ပျော် မှာပေါ့”

“သမီးက ဟော့ဒီနား ကပ်တစ်ရန် ရှိနေပြီပဲ အမေရယ်။ ဆွဲကြိုးလေးက အထွေးကို ဆင်ပေးလိုက်ပါ။ သူက တက္ကသိုလ် တက်ရတော့မယ့်သူ မဟုတ်လား”
ထို့နောက်တွင်တော့ မှန်ကြည့်ဖြစ်တိုင်း မျက်မှောင် ကုတ်၍ သက်ပြင်း မောချနေ တတ်သော မျက်နှာတစ်ခုနှင့် ကျွန်မ အလွန်ရင်းနှီးလာ သည်။ ငယ်ငယ်လေး ကတည်းက အားပါးတရရှူ ရှိုက်ခဲ့ရသော လေထုက လည်း ယခုတော့ တစ်ခုခု ပိတ်ဆို့နေသလိုလို။ စိတ်ထဲ မှာ တစ်စုံတစ်ခုဟာ ဘ၀ထဲ မှာ တဖြည်းဖြည်း ယုတ်လျော့ ပျောက်ဆုံးလာနေတာ ကိုတော့ ခံစားမိနေသည်။ ဘာရယ် ဟုသာ မတွေးဖြစ် သေးတာ။ အင်း အချိန်ပေး၍ မတွေးရဲသေးတာဟု ဆိုလျှင် ပိုမှန်မည်လား မသိပြီ။

၅။
“အမေရေ ဒီမှာ ထမင်း အိုး ငှဲ့လက်စတန်းလန်းမို့ ဆိုင်ထဲ ၀ယ်သူ မရှိရင် ကလေးသိပ်ထားတဲ့အခန်း ထဲ ပြေးဝင်ကြည့်ပေးပါဦး။ သမီးနားထဲငိုသံကြားသလား လို့”

မသိလျှင် ကိုယ်ကပဲ ကလေးအမေလိုလို။ တကယ်တမ်းက ကျောင်းပြီး ပြီးချင်း မိန်းမကောက်ယူ လိုက်သည့် အလတ်ကောင် မောင်အလိမ္မာတုံး၏ ရင်နှစ် သည်းချာသာဖြစ်သည်။ အိမ်ခွဲနေပေမယ့် သူတို့ငှားနေ တာ ဒီအနီးအနားတွင်ပဲဆို တော့ ကျွန်မတို့မှာ မျက်နှာ မလွှဲနိုင်။ ကလေးက မူကြို ထားရမည့် အရွယ်မတိုင်သေးသလို ကလေးထိန်းလက် ၀ကွက်အပ်ပြီး အိမ်မှာ တစ်နေ ကုန် ပစ်ထားခဲ့ရအောင်က လည်း စိတ်မချ။ လခက လည်းကသီတော့ နောက်ဆုံး လက်ပိုက်ကြည့်မနေနိုင်ဖြစ် နေကျ ကျွန်မနှင့် အမေကပဲ “တို့တွေပဲ ထိန်းထားပေး ပါ့မယ်ဟယ်” ဆိုပြီး လက်ခံ လိုက်သည့်သကာလကလေး က မိဘနှစ်ပါး အလုပ်သွားတာနှင့် အိမ်ကို ရောက်လာ သောင်တင်နေတော့တာပင်။

“အငယ်ကောင်က အခု ဆေးကျောင်း ဒုတိယနှစ်။ အထွေးက ဆယ်တန်းအောင်လို့ ခုမှ တက္ကသိုလ် စတက်မှာ။ တာဝန်တွေက အများ ကြီးကျန်သေးတာပဲနော်”

ဝေဖန် လာသူတွေကို ကျွန်မ ပြုံး၍သာ နားထောင် ပေးလိုက်ပါသည်။ မတတ် နိုင်ဘူးလေ။ ဘယ်သူကမှ ကိုယ့်ခေါင်းပေါ် တကူးတက လာတင်ပေးထားတာ မဟုတ်။ ဖြစ်ချင်ရာဖြစ်ဆိုပြီး ကိုယ်လွတ်ရုန်းလိုက်လျှင်လည်း ဘယ်သူ ဘာပြောနိုင် တာမှတ်လို့။ အမေ့ကိုသနား တာ၊ ကိုယ့်မျက်နှာမော့ကြည့် နေရရှာသည့် အငယ်တွေကို ဥပက္ခာမပြုရက်တာကြောင့် သာ။

“ဒီလိုပဲ တူ၊ တူမတွေ ထိန်းရင်း အပျိုကြီးပဲလုပ် တော့မှာလား”

“ဒါပေါ့၊ ငြိမ်းအေး တယ်လေ၊ မကောင်းဘူးလား”

မေးသူတွေက ဘာရယ်မဟုတ် ခပ်ပါးပါးမေးလာ တာမျိုး ဖြစ်နိုင်ပေမယ့် ဖြေသူ အဖို့တော့ ရင်ထဲကအနာ အကင်းမသေနေတာ ထိုးဆွ ခံလိုက်ရသလိုမျိုးလည်း ဖြစ်နေတတ်သည် မဟုတ်လား။ ကိုယ့်ဘ၀နှင့်မသက်ဆိုင်သော အရာဟု သိစိတ်က ကန့်သတ် ထားပေမယ့် နှလုံးသားကဖြင့် တံခါးခေါက်သံကြားလျှင် ခေါင်းထောင်ကြည့်ချင်တတ်တာက ခက်သည်။ ဒါပေ မယ့်လည်း မျှော်လင့်ချက် ပေးဖို့ရာပင် အဆင်မပြေသည့် မိန်းမတစ်ယောက်အနား ဘယ်လိုအချစ်မျိုးက နား လည်မှုရှိစွာ စောင့်ဆိုင်းနေမှာတဲ့လဲ။ တစ်ခါတစ်ခါကျ တော့လည်း (ယခုအချိန်မှာ အနီးအပါး၌ မရှိတော့ပြီ ဖြစ်သော)နွေးထွေးခဲ့ဖူးသည့် မျက်ဝန်းညိုတစ်စုံကို နင့်နင့် နဲနဲ လွမ်းဆွတ်မိသလိုလို။

သို့ပေမယ့် လက်ထဲ ပွေ့ပိုက်ထားရသည့် တာဝန် ၀တ္တရားတို့ထံ မျက်စိတစ်ဆုံး လည်ဆန့်မျှော်ငေးကြည့်မိ ပါလျှင်တော့ မလျှောက်ဖြစ် ခဲ့သော လမ်းကလေး၏ ပုံရိပ်က ပါးလျေ၀၀ါးသွားရ ပြန်ပြီ။

၆။
“တစ်ခါတလေကျ တော့လည်း ဘာမှမသိတတ် နားမလည်တတ်တဲ့ လူမျိုးတွေ ကမှ လောကကြီးမှာ အနေ ချောင်တာဟ။ တစ်ကိုယ် ကောင်းဆန်တယ် ဆိုတာ နာမည်သာဆိုးတာ လူက အတော်သက်သာတဲ့အလုပ်။ အဲဒီလို မလုပ်နိုင် မလုပ်ရက် တဲ့ တို့လိုလူစားတွေကျတော့ တာဝန်မြင်တာနဲ့ ဘယ်သူမှ ပြောစရာမလိုအောင် အလိုက် တသိ ၀င်ဝင်ထမ်း...။ ထမ်း ရင်းနဲ့ အဲဒီတာဝန်တွေက တဖြည်းဖြည်း ကိုယ့်အပေါ် ပိကျလာလိုက်တာ နောက်ဆုံး ဘယ်ကဘယ်လိုပြန်ထွက်ရမှန်း လမ်းစရှာမရဘဲ ပျောက်က ရော။ အဲဒါကြောင့် တစ်ခါ တစ်ခါလည်း ဘာမှမသိ တတ်တဲ့လူစားမျိုးပဲ ဖြစ်ချင် မိတော့တယ်”
ဘ၀တူသူငယ်ချင်း တစ်ယောက်၏ ခံစားချက် အပြည့်နှင့် ရင်ဖွင့်သံကို နား ထောင်မိတော့ ကျွန်မလည်း ဖျတ်ခနဲ တွေးမိရသည်။ ကျွန်မလည်း ယခုအချိန်မှာ “ကလေးနေရာ ကလေးနေ နော်၊ လူကြီးတွေအရာထဲ ၀င် မပါနဲ့” ဟု အရာရာ၌ အမေ စိတ်မချစွာ တားမြစ်ကန့် သတ်ခံနေရဆဲ အရွယ်လေး ဖြစ်နေသေးလျှင် ဘယ်လောက် ကောင်းလိမ့်မလဲ။ လူကြီးတွေ စကားဝိုင်းနား သီ ခွင့်မရသော၊ ထမင်းဟင်း ချက်တိုင်း ကပေါက်တိ ကပေါက်ချာ လျှောက်လုပ် တတ်သော၊ အိုးခွက်ပန်းကန် ဆေးတိုင်း မကြာခဏ လွတ်ကျကွဲစေတတ်သော၊ တံ မြက်စည်းလှည်းရာ၌ နဂိုရှိ သည့်အမှိုက်ကို ပိုမိုရှုပ်ပွ အောင် လက်စွမ်းပြတတ် သောအရွယ်မျိုး ပြန်အောက် မေ့လှပါဘိ။ သို့ရာတွင် ကိုယ်ဖြတ်သန်းခဲ့ ဖူးသော အရွယ်ပေမယ့် ထိုခံစားချက် ကို ယခုလက်ရှိ အသက် အရွယ်၏သိစိတ်ထဲ အသက် သွင်းခံစားကြည့်ချင်၍ မရ တော့တာသည်ပင် “ဒါ ဘ၀ ပါလား” ဟု ဒီကနေ့ ကျွန်မ တို့ နားလည်လက်ခံ ထားကြ ရသည့် ဘ၀အဓိပ္ပာယ်တစ်ခု မျှသာ ဖြစ်ပါလိမ့်မည်။

၇။
ယခုနောက်ပိုင်းတွင် ငယ်ဘ၀ကို ကျွန်မ မကြာခဏ အိပ်မက်မက်ပါသည်။

ငွေဇင်ယော်ဦး၊မိုးကုတ်၊

3 comments:

မိုးသက် said...

“အမေ ထမင်းဟင်း ချက်လျှင် ကျွန်မလည်း ၀င်လျှော် ကြည့်ချင်သည်..”
ဖြစ်နေတယ်အစ်မ.. ။လာရောက်အားပေးသွားပါတယ်..။

Anonymous said...

လာဖတ်သွားပါတယ် ...
ကောင်းပါတယ် ....

calyndaobringer said...

Blackjack – casino to win real money - Dr. Dr. MD
A blackjack with the 시흥 출장마사지 blackjack side is a classic bet, in which players choose to bet from either a 안양 출장샵 standard 나주 출장안마 or 충청북도 출장안마 a small number of numbers. However, a blackjack 안산 출장마사지

Post a Comment